【10 Years Challenge】10年期間FB稱霸社媒 下一個10年是?

博客 19:11 2019/01/18

分享:

年年社交媒體都會興一啲嘢,最近Facebook就興玩「10 years challenge,10年挑戰」,雖然坊間好多人都話FB已經係「老人家」嘅玩意,不過當有trend嗰時,又有班後生會上返水。10年挑戰除咗睇自己老咗幾多,其實都反映呢10年我哋有幾倚重FB。

本地明星都玩埋一份

FB係2006正式對外開放,當年香港仲係興緊Xanga、MSN,受惠當時移動互聯網強勢發展,FB造訪人數大約喺2010年進入爆發期。當時來講,FB真係好創新,因為唔再係純文字討論,可以睇朋友嘅靚仔、靚女相,覺得好睇又可以like一like,被like嘅人又得到滿足感,仲可以friend搭friend不斷識新朋友(以前最興奮莫過於聯絡到失聯中小學同學。)因此,Xanga同MSN當時嘅狀況就似再之前嘅ICQ一樣,用完即棄。

2009年FB的介面,懷念嗎?

FB可以算係第一代社交媒體,之後唔同嘅Social Media如雨春筍出現,好似Google+、LINE、WeChat、Instagram等。同時因為社交媒體容許商業宣傳,就咁衍生新嘅唔同職位,例如社交媒體編輯、網上行銷、數據分析、產品發展等唔同工種。

如果出咗來社會工作,仲要係有份做社交媒體,10前只係hea玩FB,10年後嘅今日小編們有可能係要24/7上FB,發展到日日有新嘢學,有新嘢試,同埋有新嘢煩……玩社交媒體成日要煩user interface(UI)、User Exprience(UX),又要諗點先做到content viral(病毒式傳播),隨時頭都大埋。而當年投身社交媒體嘅第一代人,唔少已經自己出來開公司,做agency接job,或者獨當一面。

10年後仲會唔會係社交媒體世界?定係FB會好似Xanga同MSN一樣被淘汰,變成AR、VR世界?結果會係點,好難講,不過一定會再衍生新嘅工種,最少網上行銷只會愈來愈被重視。所以,仲未投身社會工作的學生,近年不斷強調大數據、AR、VR、Block Chain,呢啲或者就係喺未來等緊你哋嘅新工種!

 

【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享受人生。

撰文 : 積臣

欄名 : 積財有計

緊貼財經時事新聞分析,讚好hket Facebook 專版