MPF表現要好 首先你識唔識睇呢個關鍵內容?

博客 19:19 2019/01/11

分享:

又新一年,又係時候查下自己MPF戶口嘅時候,舊年全球股市大上大落,想賺錢都唔易。咁新一年又點?坊間都好多分析,離唔開係中美貿易戰同埋美國經濟會唔會倒退。呢幾日因為中美談判傳出好消息,所以港股同美股都轉返好小小。不過轉係轉受託人或者轉基金之前,積臣有一樣嘢係睇得幾重,就係基金入面嘅投資成份。

【延伸閱讀】那些年我MPF蝕20%

各個MPF計劃入面嘅股票基金,其實都離唔開香港、中國、亞太、北美等股票基金,係部份計劃先有特色嘅股票基金,例如海通MPF韓國基金、宏利MPF康健護理基金。但唔好見大家都係同區域嘅基金就以為一樣,除咗收費唔同,基金嘅回報都可以大不同,而且可以係差天共地。

以美國股市為例,舊年當好多人以為地心吸力不會對佢有效(講緊唔識跌),但從10月開始,三個月時間就跌晒美股前3季嘅升幅。喺MPFA個基金平較平台,你見到舊年表現最差係宏利MPF北美股票基金,跌15.05%,但其他北美基金都只係跌6至8%左右,最好果個(跌最少)係萬全MPF美國股票基金。宏利MPF北美股票基金個跌幅,表現差到追得上香港股票基金,但唔好唔記得港股好早比美股見熊市。

各個MPF北美基金表現比較

當你驗屍咁驗,個原因就係投資組合分布。睇返宏利MPF最新基金便覽(最新都只係第3季!!),你見到10大資產入面,有5.44%係持有General Electric Company,即係通用電器(GE),呢隻股票除咗牌頭出名,同時出名唔識升,2017年同2018年上半年美股牛市下個股價都係咁跌,表現差到喺舊年6月被剔出道指成份股。當然除咗呢隻,仲有幾隻表現都唔太得嘅Citigroup花旗集團、Lennar Corp萊納房屋、Goldman Sachs Group高盛等,所以表現較其他美股基金落後。就算宏利將資產放重係Apple同Amazon,都獨力難支喇!

10大資產唔少表現唔太得

攞東亞(強積金)北美股票基金便覽嚟睇(同樣都係第3季),你會見到10大資產入面,大多數都係2018年前3季升得唔錯嘅股票,而且分布比宏利平均。所以2018年第4季美股跌市嗰陣時,前3季升幅可以擋一擋個第4季跌幅,起碼唔使蝕10%以上先喇!

表現較好

我諗唔少人都會問點解萬全MPF美國股票基金可以跌咁少,主要因為佢10大投資入面大多數係牛市股,詳細可以見下面張圖。萬全曾經將AMAZON持有10%以上,所以2018年AMAZON爆發帶挈萬全MPF美國股票跑贏同行可惜積臣無CAP低舊年紀錄,但我諗有用開萬全MPF嘅人會收到佢份基金便覽。

萬全mpf投資係牛市股

講到呢度,我諗大家都明重點喺邊,MPF表現要好,除咗要揀啱受託人,隻基金入面嘅持股重比重都好重要。大家對上面提到嘅股票表現有興趣嘅話可以去Google Finance度check。最後戴下頭盔,以上並不構成任何投資建議,僅提供作參考用途。

 

【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享受人生。

撰文 : 積臣

欄名 : 積財有計

緊貼財經時事新聞分析,讚好hket Facebook 專版