【儲錢大計】不能錯過的5種儲錢大法

博客 16:28 2019/01/04

分享:

新一年,唔少得要講下計劃同目標,講到儲錢,最Hit就係近日網上流傳「365存錢法」,「365存錢法」係2018年初亦曾經Hit過一輪,今年就因為有人係網上分享「加強版」,儲滿咗2大4小共6隻豬仔錢罌,再次引起話題。不過積臣覺得用乜嘢方法係最有效其實都幾睇個人情況,未必可以「一本通書睇到老」,所以除咗「365存錢法」,我搜尋咗坊間較多人分享嘅儲錢方法,大家可以睇下邊個方法啱自己?

365存錢法」即係咩?

循例都講下「365存錢法」係咩嚟先,即係儲錢嘅人由第1日開始儲1蚊,第2日儲兩蚊,依此類推,到咗年尾,總計就可以儲到66,795蚊。每日要儲咩金額可根據自己個儲蓄目標。至於「加強版」,其實即係每日再儲多啲,埋單總結時儲蓄額條數就會大啲。呢種每日設定一個目標嘅方法係最啱無理財規律嘅人,強迫儲錢。

台灣網民分享365存錢法,每日成功儲錢就剔一剔。

365存錢法」之外的選擇

除咗「365存錢法」,仲有其他選擇︰

52周儲錢法

同「365存錢法」相近,唔同嘅係由每日儲錢改為每周儲錢,而且儲錢金額係遞進式,例如第一周儲10蚊,第2周儲20蚊,第52周係儲520蚊,到年尾就可以儲1.3萬780元。呢種方法啱周末先有時間管理自己生活嘅人,而每周儲蓄金額可因人而異。

136分配法

即係將每月收入分配成3份,10%用喺保險,30%用喺儲蓄,例如儲蓄戶口、基金等,60%係每月生活開支,想更仔細一點,可以將60%細分為租金、家用等項目。呢種方法好處係預先分配好每月支出同儲蓄,避免「用突」。

零存整付法

食飯畀錢、買嘢飲、買衫褲一律畀紙幣,例如20、50、100蚊等,找返來嘅銀仔就儲落豬仔錢罌,久唔久之可以儲一大筆錢。呢個方法啱晒唔想記、唔想煩嘅人,同埋收入較高嘅人,缺點係每月儲蓄額唔穩定,亦容易令用係生活開支個數目少咗,唔夠cover。

每月存錢法

呢個方法應該較多人知道,將每個月份糧指定數目拎去儲,容易計算自己儲咗幾多,知道離目標仲有幾多距離,有啲人會專登將開一個儲蓄戶口,每月由出糧戶口自動轉帳要儲蓄數目去呢一個專用嚟儲錢嘅儲蓄戶口,咁就唔怕自己唔覺意用咗要儲嘅錢。

最後,都要戴下頭盔,以上方法無話邊一種好,亦唔一定係「死咕咕」要跟呢個百分比,亦唔係話一定要搵個豬仔錢罌入銀仔落去。其實呢啲方法嘅用意都係要令自己「養成儲蓄習慣」,所以金額反而唔係重點,老土講一句就係積穀防饑,進一步諗,呢筆錢可能就係幫到你追夢嘅一筆儲備。

 

【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享受人生。

撰文 : 積臣

欄名 : 積財有計

緊貼財經時事新聞分析,讚好hket Facebook 專版