你資產要幾耐先翻倍? 善用「72」魔術數字

博客 18:47 2018/12/28

分享:

上星期講左新一年可以點樣set target,應該唔少人其中一個目標就係想搵多啲錢,除咗返工收人工之外,大多數香港人都會投資,不過正如上星期所講,set目標嗰陣時應該要measurable,所以set個目標數畀自己唔少得。

【延伸閱讀】3個學校無教步驟 幫你設立年度目標

投資時可以記住一個魔術數字,叫做「72」法則,可以用嚟粗略計算你嘅投資要幾耐先可以翻到double。「72」法則係有理論解釋到,不過我就唔深入講喇,因為實會長篇大論。

只要記住,用72除以你投資組合嘅回報,就係你得到嘅答案。例如,你投入本金係20萬,你嘅投資年回報率係7%,用72除以7,咁即係話你需要用10.285年先可以令投資本金增加一倍,即係40萬。回報率愈高,所需時間就愈短。

雖然「72」法則未包含風險等因素,但佢嘅目的係要話你知喺穩定嘅平均報酬率下,財富倍增同時間嘅關係,當中隱含嘅就係大家耳熟能詳複利效果。呢啲數唔難計,你可以係excel set幾個situation,喺唔同本金同回報率情況下,達成目標嘅時間要幾耐。

同理,如果某個投資產品話你知20年後連本帶利可以賺到一倍,先唔好開心住,你可以用「72」法則計一計,72÷20=3.6,即係每年只係3.6%回報而已。

所以,好好檢視一下你嘅投資計劃吧,計算一下要變成有錢人或者要畀到首期買樓需要幾耐,如果條數離你心目中有段距離,或者你要重新檢視一下你𠵱家嘅投資工具喇。更重要係,光陰有限,愈早揀啱正確投資工具,可以令你行少好多冤枉路。

 

【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享受人生。

撰文 : 積臣

欄名 : 積財有計

緊貼財經時事新聞分析,讚好hket Facebook 專版