【新一年目標】3個學校無教步驟 幫你設立年度目標

博客 18:38 2018/12/21

分享:

仲有一個星期多啲就進入2019年,新一年第一日除咗喺除夕倒數完返屋企大覺瞓之外,通常都會為自己訂立新目標。不過訂立新目標之前,我建議大家問下自己有幾多舊目標未達成?又或者訂立嘅目標太多,最後自己都唔知從邊方面入手,或者唔清楚要先做咩?有邊啲最後搞到草草放棄?積臣最近睇到一個台灣YouTuber,佢介紹咗3個步驟,可以幫到自己搵到來年真正想要完成嘅事,令自己可以制定一個理想嘅新一年目標規劃。

回顧

首先,你要回顧一下你喺呢一年發生過嘅事,因為呢啲事會深深影響你對未來嘅規劃。你要認真回答下面5條問題,而呢啲問題會引導你喺新一年真正要完成嘅目標︰

  1. 今年7件最美好嘅事情,例如減肥、加人工、挑戰馬拉松等,目的搵出對你重要嘅事同價值,幫你搵到更多頭緒去制定目標;
  2. 今年5堂最寶貴嘅教訓,例如男女感情分手、投資被呃、生意失敗等,目的係從失敗中學習;
  3. 今年接受嘅3個挑戰,例如公開演講、換新工、接受新任務等,目的係回想有咩挑戰令你生活有所提升,令你生命活得更好;
  4. 對比現狀,新一年想改變嘅地方,例如做運動、進修、學習另一種語言,同時排出優先次序;
  5. 用一個最好詞語總結你過去一年,目的係引導你喺新一年應該向邊個方向走。

當你答晒5條問題果陣時,你應該浮現唔少頭緒同Idea喇。

制定目標

第2步係制定目標,如果無目標,個人就會容易迷失。建議喺8個領域,包括生意/工作、財富、思維、健康、家庭、關係、精神,同埋生活品質,畀自己訂立10個目標。同埋,活用S.M.A.R.T.原則(Specific、Measurable、Attainable、Relevant、Time-based),可以幫你更快更清晰set target。

執行

到執行嗰陣時,亦都有有4點要記住︰

  1. 制定指標,例如新一年係想減肥,咁你就要計算每個月要減幾多公斤,每日只可以吸收幾多卡路里等;
  2. 把每一個步驟都記低,每周keep住回顧呢個步驟係咪有效,唔得就去改良;
  3. 要睇埋人事,邊個會阻礙達成目標,或者邊個可以幫到你達成目標;
  4. 有好嘅Idea可以幫你更完滿完成目標,正所謂三個臭皮匠勝過一個諸葛亮,請教你朋友,令你個Idea更完整。

好喇,步驟睇落好似好多,但要成功往往離唔開要有熱誠同埋持續努力,當呢啲嘢成為咗日常習慣後,就唔會覺得麻煩同辛苦。

 

【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享受人生。

撰文 : 積臣

欄名 : 積財有計

緊貼財經時事新聞分析,讚好hket Facebook 專版