【又到聖誕】過一個有意義聖誕! 推介另類聖誕慳錢活動

博客 18:30 2018/12/14

分享:

Jingle bell!Jingle bell!仲有一星期多啲就到聖誕節,近排出街應該見到唔少商場、商店都播緊聖誕音樂。唔少人都會儲埋年假一次過喺聖誕節放晒去個長途旅行,但無Budget、無假去旅行嘅人唯有留返喺香港喇,但係節日出街,荷包都係會大出血!

聖誕節好多餐廳都靜雞雞加價,除非係一早Book咗枱或買咗早鳥優惠。聖誕出街食飯特別多人同逼,但聖誕假唔出街,留喺屋企的確係幾悶,出街又唔想使太多錢,其實都有免費活動嘅,例牌去維港兩岸睇下聖誕燈飾,又或者各大商場或購物中心都有聖誕活動或者聖誕市集。所以要慳慳地過一日總有辦法嘅。積臣覺得行街、shopping、食晚飯呢啲活動平時都做,放長假都倒模咁做其實都幾悶。

中環大館係最近免費開放的旅遊景點

其實除咗吃喝之外,仲有其他更有意義嘅活動,有靜態亦都有動態,例如同朋友去做義工,陪獨居嘅公公婆婆一齊食吓飯,希望佢哋都可以感受到聖誕氣氛。又或者參加郊野公園清潔隊,幫手清潔郊野公園同離島嘅海岸垃圾,體力充足嘅人更可以參加山野清潔隊。積臣覺得呢啲活動慳到錢之餘,更可以為保護香港郊野出一分力,仲可以識到志同道合嘅朋友,生活圈子都大啲。

唔少NGO都有聖誕義工活動

如果想一班朋友聚埋歡度聖誕,其實都可以踩下單車、行下山等戶外活動,又或者約朋友去郊外野餐代替傳統嘅聖誕派對,各自預備一款食物Share,又慳錢又可以親親大自然,好過去酒吧飲個通宵達旦,然後返屋企大覺瞓無咗一日。

 

【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享受人生。

撰文 : 積臣

欄名 : 積財有計

緊貼財經時事新聞分析,讚好hket Facebook 專版