【豐澤事件】從豐澤事件睇香港消費者權益

博客 18:43 2018/12/07

分享:

近幾日係網上嘈到最勁除咗華為創辦人個女被人拉咗、習特會之外,有一單係你同我都估唔到,就係豐澤網站故障事件嘞!

事源豐澤個網店系統係星期四零晨出錯,令到部份貨品價錢標錯咗,298蚊任買iPhone、電腦、相機等,事件好快就喺網絡世界瘋傳,唔少網民蜂擁而至,一度令豐澤個網塞爆。不過,豐澤好快修正返個系統,今日豐澤就宣布退回款項畀買家同埋賠償300蚊電子禮券。

From連登巴打「伸手入龍門 」

豐澤呢個決定就激嬲網民喇,有討論區更加有網民成立咗「苦主大聯盟」,唔接受「誠哥」嘅和解方案。討論區內引發激烈辯論,另一批網民就指「苦主」咁樣搶着數好肉酸,「苦主」又反駁話係維護消費者權益……

喺香港,合約法係容許商家喺交易中出錯,如果證明到係系統出錯,豐澤係可以取消交易,當然消費者有權唔接受方案,透過民事方式索償,但民事案搜證有幾咁煩,相信唔少人都知,如果你係「苦主」,又會唔會咁做呢?

其實網店因系統出錯而標錯價事件屢見不鮮,香港過往都有出現過幾單。2015年,實惠網店將1,580蚊冷氣機標咗做1.58蚊,有顧客買咗都要被cut單同退款,官方話因為系統出錯嘅緣故。2017年,HKTVMall就因系統出錯,將原價968蚊嘅4人澳洲牛扒或羊扒晚餐套餐,標錯為148蚊,HKTV就作出特別安排,令買家成功兌換到晚餐。從以上兩單嘢睇,店家處理關公事件得當,係會令市民對你有正面評價。

睇返國際例子,就會發現有趣嘅消費者權益嘅例子。2009年,戴爾(Dell)電腦標錯價事件引起網友瘋狂落單,但Dell事後拒絕出貨,只補償折價券,引起31名台灣網民不滿,集體怒告Dell。法院認為以戴爾電腦嘅規模,不該會出錯,故標錯價有「故意」行為,再用折價券補償係「促銷伎倆」,判戴爾須依契約出貨。

喺十分注重消費者權益嘅美國,HP電腦、sony同埋百貨公司Target都試過標錯價,但最後都係乖乖出貨。美國唔少商家更容許買家可以30日換貨同退款(用過都可以),買貴了可退差價等。當然,美國係有Consumer Protection Laws同Bureau of Consumer Protection喺背後做back up。另外,好多時店家都想維護品牌形象,標錯價都肯出貨。

近月係美國上市嘅拼多多,就被多間美國律師行集體告佢係平台上賣假貨(有分析話原因唔止咁樣,係想幫投資者追討股價上損失,真相係點真都唔知了)。有集體訴訟權嘅地方(台灣叫團體訴訟),可以集合多名消費者針對同一名被告人提出申索,令消費者有渠道保障自己權益。

唔少香港人話香港無乜消費權益可言,消費者好多時有冤無路訴,加上消委會權力又有限;商品說明條例都係最近幾年先實行,嚴重落後於其他先進地區。但今次商品說明條例又唔適合用喺豐澤事件度,至於網民會有咩下一步行動?積臣都係食住花生等睇戲mode喇。

 

【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享受人生。

撰文 : 積臣

欄名 : 積財有計

緊貼財經時事新聞分析,讚好hket Facebook 專版