【網購盛行】你有冇中咗網店營銷陷阱？

啱啱完咗中國嘅「雙11購物狂歡節」，話咁快就係美國的感恩節（Thanksgiving Day）、黑色星期五（Black Friday）同Cyber Monday，兩個「節日」基本上都係叫人瘋狂Shopping，周圍都講緊呢幾日的嘢特別平，唔買就走寶嘅概念。今次積臣想分享下依家網購嘅陷阱。

網購趨勢擋不住

阿里巴巴公布雙11嘅銷售額近2,135億元人民幣，並收到超過10.42億個訂單，再創新高，美國全國零售聯合會都預期Black Friday銷售增長4.1%，所以話網購只會成為世界潮流。

今年積臣嘅身邊朋友都多咗留意呢兩個節日，除左雙11去淘寶網外，佢地對美國Black Friday更加感興趣，因為好多知名國際品牌嘅時裝、電腦、電器、生活用品（例如枕頭同鬚刨）都大減價，縱使唔少美國網店會限制海外消費者。

積臣都觀察到普遍網民都鐘意係淘寶網買啲平價用品，一買就要買幾件以上，但佢哋都唔吝嗇喺美國amazon揼本買電腦同家電等貴價產品，不過呢啲產品嚟到香港就會無晒保養。其實或多或少都反映香港人始終比較信任「來佬貨」。

哄你買多啲貨品陷阱

呢幾日全場貨品7折、買一送一、買滿幾多全單幾折同免運費等市場營銷手法千變萬化，加上社交媒體嘅廣告推波助瀾，市民好易就被打動，慷慨解囊。其實呢啲無非都係想你買多啲，買得愈多愈抵，所以好多時消費者為咗滿足優惠條件，刻意將購物籃塞滿，又或者見啲嘢只係幾十蚊，就唔理三七二十一就乜都落咗單先，後來送到屋企先發覺自己係唔需要嘅，最後就放埋一邊，件貨品最終就成為咗垃圾。

送唔等使嘅禮品或贈品陷阱

有時商家會送啲小禮品或贈品等，營造好多嘢送、好抵嘅感覺，引你入去買嘢，不過好多時呢啲小禮品或贈品自己已經有一套，或者係gimmick嘢多。積臣都曾經係淘寶買過手機殼，商家送USB充電綫、Mon貼、手機防塵塞等，好似好豐富，但我收到後發現唔啱用同埋品質好差，最後都無用到，放埋一邊。（迷之聲︰靚嘢就唔送俾你喇，會蝕本㗎！）

「買家秀」中伏記

唔知又係咪我運氣差，淘寶買親嘅嘢好多時都好快爛，不過中伏又豈止我一個呢！喺淘寶同天貓，有一樣嘢叫「買家秀」，意指購買某商品嘅買家把商品以文字或實物照片嘅形式喺網上展示，畀其他買家參考。每年雙11之後都會湧現一堆「買家秀」，大陸網民係呢個時侯就會展示佢哋嘅創意。

係咪笑出嚟呢？咁搞笑嘅「買家秀」喺百度輕易搵到。側面反應出一個大家共知嘅事實，淘寶貨雖平，但質素真係參差不齊，故事同時反映網店嘅產品無得試，買完返來發覺唔啱用，一係退貨，一係就嫌麻煩直接掉咗佢，最係去咗堆填區，造成浪費。如果係喺美國買，隨時退貨嘅來回運費已經貴過係香港買。

積臣唔係話針對淘寶網，因為相對來講，美國網購中伏位真係少啲。今年我無參與瘋狂Shopping，因為今年真係無嘢想喺呢兩曰買。積臣其實都係想提返大家，要分清自己的物質需要，唔好被潮流牽着走，唔係最後唔止浪費金錢之餘，仲會增加更多垃圾。

 

【作者簡介】90後製作公司打雜，熱愛打機，亦愛行山吸收靈氣，希望快啲儲夠錢享受人生