【股神教時間管理】太多嘢做唔晒? 提升效率先放棄20件想做嘅事

博客 17:54 2018/11/16

分享:

話咁快就係11月中,仲有個半月2018年就完結,係咪覺得時間過得好快,但呢一年又好似無做過啲咩呢?又或者訂立過嘅一年目標,一件都無完成到喎,到新一年嗰陣時,就將未完成嘅目標當做新一年嘅目標,無限Loop,個目標一直都無完成到。

喺依家手機不離身嘅年代,更加會分散人嘅注意力同集中力,加劇大家嘅拖延症,想做嘅事最後拖到不了了之。想做好時間管理同提升工作效率,又點止得積臣呢啲公司打雜,話說最近睇緊一本online book,講到「股神」巴菲特,相信好多人唔會否認巴菲特係成功人士,但成功人士之所以成功,其中之一係佢哋都有一套嘅個人管理法則,股神都唔例外,坊間叫佢嗰套做「巴菲特兩項清單法(2-list strategy)」。

股神巴菲特

巴菲特兩項清單法

故事要由巴菲特嘅私人飛機駕駛員Mike Flint講起。有一次,Mike對自己生涯規劃同財務狀況感到困惑,於是請教巴菲特,巴菲特好慷慨分享佢自己嘅法則。巴菲特先叫Mike寫25個想要完成嘅事,事業、愛情、金錢都寫得,Mike即刻照做,之後巴菲特又叫Mike係25件中揀5件最重要嘅事,咁樣Mike就有咗兩份清單。

好多人見到兩份清單,直覺係最重要嗰5件事應該要優先完成,完成咗之後再做剩低果20件事。不過巴菲特會同你講「No」。巴菲特當時都係咁問Mike,Mike回答係先專注做5件事,有時間先做剩低嘅20件事。巴菲特就話你依家要做嘅係放棄剩低嘅20件事,因為嗰20件係會分散你嘅注意力,會累你唔能夠專注完成最重要嗰5件事。

講到呢到,大家應該都明啦啩!如果你嘗試完成每一件事嘅話,你就會連一件事都完成唔到,晒時間係次要任務度,就會導致你完成唔到最重要嘅任務,所以你應該要好似避瘟疫咁避開啲瑣碎事,唔好花任何時間同注意力係佢哋度,應該強迫自己專注做一件事,直至完成為止,如果唔係就唔好做。

參考巴菲特提升日常工作效率

所以,有咗具體目標,你先能夠反覆去實現呢個目標嘅方法同路徑,同時由於每個人嘅專注力有限,所以更應該要識得去剔除次要嘅事項。

兩項清單法同樣可以用於日常工作度,前一晚寫低聽日要完成嘅5至6件事,最重要嘅事排先,利用朝早頭腦最精神嘅時間完成愈多事項愈好。到咗夜晚就檢視一下張清單,將完成嘅事剔一剔,增加滿足感,之後再計劃聽日的清單。如果有事情完成唔到,將佢放落聽日嘅清單,並且當係最優先事項,最重要係每日唔可以超過5至6件事,因為愈多事情只會令你更心煩。只要有咗規劃,我哋個大腦就會啟動執行模式,專心一致咁去完成,工作效率自然會提升!

 

【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享受人生。

撰文 : 積臣

欄名 : 積財有計

緊貼財經時事新聞分析,讚好hket Facebook 專版