你係邊種窮?對症下藥有得醫

博客 17:47 2018/11/14

分享:

窮,係結果。唔想有窮呢個結果,就要搵出原因再根治。博客窮一生認為,窮都有分幾個屬性,好似睇中醫咁,你了解左自己係咩底的人,之可以對症下藥去醫。窮一生提出窮人有3類,如果你自命窮又想改變窮的命運,不妨先檢測一下自己屬於邊種窮,再搵方法醫窮。

1.消費系

【病徵】消費型貧窮係受香港環境影響而生。香港係資本主義社會,消費主導。大家習慣咗以錢去解決生活上的問題。餓?外賣囉!朋友見面,一定係宵夜直落啦!啲嘢壞左咪換過新囉......要使洗起上嚟,以一個月約二萬的一般打工仔來講,係咪真係咁足夠俾你去用錢解決問題呢?

【治療】美沙酮療法

所謂消費型的人其實係上咗癮!癮君子大多係意志力薄弱人士,治療應該由淺入深,了解自己一個月的行為模式以及消費習慣,再去由你最冇癮嗰樣嘢開始減,例如比起食好嘢,我更加可以忍得到唔飛的。咁就減左飛的先。

錢方面我哋可以先定下自己一個月的開支預算,先定一個儲錢計劃,例如月入15k,我一開始要定下月儲5k的目標。交3k家用,有7k可以用的。出糧先交家用,之後把5k轉到另一個戶口,將嗰個SAVING戶口的卡剪咗佢。或作月供盈富基金(02800)投資等等。總之唔可以咁易用到!以5k的目標要年年增加,做到個人消費大約開支佔你收入25%以下為健康。

2.家貧系

【病徵】呢類在香港都多,2016年統計署報告都話,香港有接近100萬貧窮人口,可見低收入家庭係唔少。作為低收入家庭的下一代,見住人地有DADDY俾埋首期,一畢業就開始供樓。而你一出嚟12k一個月,仲比阿媽迫你一個月交5k家用先夠開飯。內心果種無奈窮生係好明白,因為窮生係家貧型貧窮底。

【治療】化療

呢個情況係最難搞,因為呢個型係唯一牽涉到其他人的情況。你一定要同家人一齊定下共識。必要時你仲要把持左屋企的財政。因為呢個型係由上一代是旦一部分的家人係消費型/窮忙型而衍生出來。你一定要係一個精明而量入為出的人先,以化療比喻因為當中你一定同家人會意見不合而磨擦。係有傷害性,甚至極端情況係會家變的。

不過如果你唔解決,只會誇代貧窮下去。要改變一定要硬起心腸!計一計家庭基本生活開支,比一個緊緊夠用的家用金額。為屋企同自己日後都累積到財富先得!

3.窮忙系

【病徵】呢種朋友多數係低學歷人士,有部分更可能係人生冇乜目標,唔擅長計劃的一群。低學歷低技術自然難以叫價。女生多見於文員,月入低於1萬。男生可能係做倉,食肆,超市之後地方,月入可以萬幾,但最慘好快見頂,頂薪做到老也可能只有2萬多元。而且呢類工大多數工時好長,又困身。好快,你的圈子就得返同事,眼光也只有舖頭以內,沒有時間同心力累積財富,就算累積2、30萬,你都冇知識去好好利用呢筆錢。

【治療】物理治療

叫物理治療係因為,低學歷人士長時間冇吸引新知識,大腦同身體都對新事物開始有麻痺感覺。要透過進修/轉行,一步一步由困身而低收入的困境走出來。慢慢恢復同外界既聯繫,同吸引新知識,新技術既習慣。例如你可以報讀語文或專業技能相關課程,考取有關資格。由日日12小時的手動工作,慢慢多用腦去work smart。回復生命既靈活性!

【文章來源:窮家有道;獲作者授權轉載。原題:「理財專家不會教你-了解自己窮的屬性」】

關於作者:

窮一生,80年代末期出生,背負著香港地所有失敗者的標籤。 單親家庭、公屋仔、母語教育、唔靚仔、冇錢、讀乞食科、從事全香港公認最乞食的行業。 22歲由3萬元的總資產,12K的月薪開始上路,26歲儲到人生第一個100萬。2年後再把這100萬翻倍! 自小明白錢很重要的窮生,並沒有為此而變成為利是圖的人。 反而憑著理財的優勢支持自己繼續當這不能搵食的工作。 天生數字狂,乜都鍾意計一餐,卻反而是個設計工作者,相信人是立體的,人生也一樣。有了理財技能使我可以「窮一生」的追逐興趣!

 

撰文 : 窮一生

欄名 : 窮家有道

緊貼財經時事新聞分析,讚好hket Facebook 專版