【假日好去處】荔枝窩漫步山林古鄉 嘆山水豆腐花

博客 19:05 2018/11/02

分享:

每逢秋季,都係行山的最佳時間,呢段時間都會多咗人去郊外呼吸大自然空氣。積臣都唔例外,話晒積臣除咗希望快啲儲夠錢享受人生,都鍾意行吓山唞吓氣,因為積臣好同意前輩所講,「有錢但都要有命享」,所以keep返個身體都好緊要㗎。今次積臣就介紹一條啱一家大細一齊去的行山路綫──荔枝窩竹林古鄉之旅。我係10月中行過呢條路綫,啱啱好係十號颱風山竹之後,所以一路行都見到山竹的餘威,體驗到大自然嘅威力。大家行果時都要小心啲喇!

路徑: 烏蛟騰>苗三古道>三椏灣>小灘>荔枝窩>分水坳>谷埔>鳳坑>鹿頸

長度:約14公里

需時:約6小時

難度:2.5

景觀:4.0

由烏蛟騰出發經荔枝窩到達鹿頸

交通︰

烏蛟騰起點: 小巴20R, 大埔墟站公共小巴總站上車, 烏蛟騰小巴總站落車

鹿頸終點: 小巴56K, 往粉嶺港鐵站

公共交通工具 單程收費
小巴20R $10.2
小巴56K $8.6

出發前提醒︰小巴班次較為疏落,要預好行程時間。同時路綫較長,要預備足夠嘅水同食物。係三椏村同荔枝窩中途有小鋪,可以買補給品同食豆腐花,價錢一定係貴過市區,想慳啲自己帶齊補給品喇!

烏蛟騰出發

到咗烏蛟騰小巴總站,落咗車左面有條短啲嘅行山徑去到荔枝窩,但由於塌樹令到條路Block咗,同埋行呢條綫無得睇三椏灣沿途風景。係總站右面入烏蛟騰村,經過一排村屋後見到有間粉紅色屋,粉紅色屋右面就係出發去荔枝窩。沿途路段唔難行,但有啲路被倒塌咗嘅樹阻擋,有可能需要兜路或者跨過啲樹繼續行。

烏蛟騰小巴總站

圍繞呢棟粉紅色屋向右面行山徑前

烏蛟騰風景

沿路唔難行

沿路的山林

沿路的山林

三椏灣欣賞印洲塘海岸公園

沿苗三古道一直行,見到一遍紅色土地同紅樹林,就表示到咗三椏灣喇,呢段風景仲可以睇到印洲塘海岸公園,平時要塔船先可以近距離欣賞到印洲塘海岸公園㗎。積臣覺得呢段風景係幾有特色。如果有細心留意下的話,係會睇到紅樹林專有的品種招潮蟹同彈塗魚。(小知識︰土地變成紅色嘅原因係因為氧化作用令泥土中含鐵的礦物轉化成紅色的氧化鐵)。

見到紅樹林表示到左三椏灣

三椏灣紅土地

由三椏灣望印洲塘海岸公園

山竹將海上垃圾都湧返上岸

沿三椏灣海岸行,接上水泥路後來到三椏村,有士多及茶檔可作補給同食飯。三椏村周圍嘅農田有一種包圍你嘅感覺,打卡selfie一流。

三椏村

三椏村農田

古鄉荔枝窩

穿過三椏村之後,進入林蔭路段繼續行,沿小溪旁行一直來到泥灘,會見到沙頭角,清楚望到對面深圳鹽田港。再沿海岸行就到古鄉荔枝窩,積臣去嘅時侯見到有班義工係到清理山竹帶來嘅破壞,積臣非常敬佩佢地假日都抽空做義工。荔枝窩村入面可以補給,記得試埋山水豆腐花先好走呀!(提醒︰如果想提早離開,都可以係呢度搭船返馬料水,可以先問咗村民班次係點安排)。

行到泥灘就見到對面係深圳鹽田港

見到義工係度善後

荔枝窩村內

荔枝窩村介紹

村內一景

山水豆腐花

下一站谷埔及鳳坑

離開荔枝窩後,沿指示牌去谷埔及鳳坑,呢一段路係最難行,因為係最多塌樹嘅一段,行果時要跨過去同埋要俯低身穿過塌樹。到咗谷埔條路一切都順返,亦可以欣賞到谷埔濕地同沙頭角海,好近距離睇到深圳沙頭角。再沿海岸行,就可以到達終點鹿頸,到達終點時已經係黃昏時間。

塌樹情況好嚴重

塌樹情況好嚴重

谷埔濕地

沙頭角海

鳳坑村

【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享受人生。

撰文 : 積臣

欄名 : 積財有計

緊貼財經時事新聞分析,讚好hket Facebook 專版