【MPF蝕錢】那些年我MPF蝕20%

博客 18:42 2018/10/26

分享:

有買股票嘅人,今年應該被港股市場chok到無晒心機,最近連美股都瀉埋一份,真係要問返句「哪裡會是個投資天堂?」!但唔好以為無買股票就唔關你事,事關每個人出來工作點都要供返份MPF,如果你揀咗「股票基金」或「混合資產基金」,其實都有股票成份。如果自己唔去了解揀咗啲咩,其實好弊,乜都唔識,亂咁來只會更加危險。

入職填表亂咁揀

今年港股嘅情景令我諗返起2014至2015年啱啱出嚟打工,當時嘅我對MPF都係一知半解,入職時人事部叫我填MPF form,我諗好多人都好似我咁亂咁填,見邊隻基金過去回報標青就剔邊隻,或者比較邊隻基金手續費少啲,再唔係就驚死蝕晒就揀無乜回報嘅「保守基金」(以前叫保本基金,但被人踢爆本都保唔到之後就改咗名)。最後揀咗咩,相信好多人嘅答案都係一樣:「唔記得」,唔係基金公司寄年結單俾你,你都未必知原來自己供咗呢隻基金。

MPF蝕20%

咁嘅情況之下,結果當然係回報唔理想喇!對一個初出茅廬嘅後生仔來講,當然唔滿意啦。2015年年頭,睇到報道先知道MPF原來可以轉換基金,仲要唔收手續費,咁啱之後中港股市大時代,我就將所有供款轉晒去中港股票同亞洲股票基金,心諗今鋪掂喇呱!

不過正如日本動畫鋼鍊所講「真理就係不讓人類得意忘形,要給予你正確的絕望」。2015年年中,中港股市急瀉,幾個月嘅升幅無晒,打回原形,好似發咗場夢咁,但我個MPF戶口嘅balance就好無情咁話俾我知成件事係真嘅,因為我成個MPF戶口蝕咗10%,我嗱嗱臨將所有錢轉去保守基金,諗住「止蝕先」,之後中港股市好似有回升跡象,我又轉返晒去中港股票基金,後來,中港股市又再跌過,我又將MPF供款轉過保守基金,來來回回,就好似歌詞「來回地獄又折反人間」咁無限loop,最後我戶口總共蝕左20%。

認清事實:自己唔係巴菲特

高沽低買,係每個投資者嘅目標,但呢一次我嘅經歷係高買低沽,策略錯晒!但諗深一層如果我做到,一早做咗股神巴菲特喇。所以,結論係要睇自己投資年期同可承受風險,搵返適合自己嘅資產比例、可以接受嘅波幅。如果係後生仔,積臣係建議基金組合應該較為進取,利用年齡去分散投資周期帶來嘅風險,更加唔好因短期升跌波幅亂咁轉換基金。

雖然我可以安慰自己避開咗2015年年尾果浸跌幅,令我MPF蝕少咗,但故事教訓我就係買咩基金之前,最好要知道嗰個市場發生緊咩事,正如我個例子,2015年內地A股政策市令到中港股市波動,但積臣就係心口掛個勇字之下喺波動時間衝咗入火場,變咗賭博咁,最後跌咗落火坑。雖然MPF筆錢理論上唔到退休都唔郁得,但見住蝕咗20個巴仙,都咪話荷包唔痛。所以後來我不斷惡補自己嘅金融知識,起碼要知道呢個世界市場發生緊咩事。

今年市況似足2015年

最近,網絡討論區又開始熱烈討論緊MPF轉咩好,有啲話𠵱家只係調整,轉去美股喇;有啲話轉美債喇,債息高呀;有啲話轉保守,環球股災到喇。呢啲言論背後都可能有一個共通點,就係𠵱家蝕緊錢,積臣唔係專家,唔會叫人點樣轉先係好,但積臣今次分享自己經驗,都係想畀大家睇吓,亂咁來無策略只會好似積臣當年咁傷。

最後,肯定有人問我蝕咗嗰20%最後點樣,返唔返到家鄉?積臣喺2017年頭將供款轉晒去香港股票基金度,托2017年香港牛市嘅福,條數最後填得返。之後我整合咗MPF戶口,呢個MPF投資嘅經歷就成為咗本人嘅黑歷史,交過「學費」。最後都要戴一戴頭盔「投資一定有風險,基金投資有賺有賠,申購前應詳閱基金便覽」。

【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享受人生。

撰文 : 積臣

欄名 : 積財有計

緊貼財經時事新聞分析,讚好hket Facebook 專版