無現金社會-香港無現金發展真係好落後?

博客 19:46 2018/10/19

分享:

最近兩日,各大論壇又再掀起電子支付的論戰,只因為一年一度嘅全球支付報告(World Payments Report)公佈最新世界經濟體嘅支付數據。自從大陸嘅無現金支付迅速普及,香港網上言論唇槍舌劍持續不斷,好多人嘅同感就係香港電子支付發展好落後。

香港無現金發展真係好落後?

積臣唔覺得香港電子支付好落後,反而係好多選擇,有八達通卡、信用卡、各種手機錢包,亦都有歷史悠久嘅EPS,同香港人少用嘅預付卡同借記卡,日常生活消費都可以用到。好多人覺得太多太亂唔知點好,但積臣就覺得市場自然會淘汰劣質產品。積臣自己就有齊主流的電子支付工具,𠵱家出街消費好耐無拎過現金出來。

平時搭車我係用八達通卡,同時一早幫張卡set咗自動增值,自此我無出現過上咗車要摷散紙嘅尷尬情況。至於日常消費好似係超市、快餐店、生活用品店、服裝店等,我會用八達通卡同信用卡,近年唔少信用卡都加咗Visa同Mastercard的非接觸式支付功能,所以信用卡𠵱家亦成為我日常小額付款嘅工具,同時加快咗我儲積分速度。

以往八達通卡最被人垢病,就係無得好似手機錢包咁做到即時過數,食完飯夾錢撳幾個掣就搞掂,唔使再現兜兜儲落一堆大餅。所以八達通都順應民意推出O!ePay,但可惜好多用家都話個App設計太差,跟住轉用Payme。加上最近金管局推出埋「轉數快」,令到各銀行同電子錢包之間都做到即時過數,之前一直被人垢病嘅P2P轉帳都搞掂埋,至此我更加少拎現金出來用,就連散紙包都收埋咗。

其實睇返𠵱家未接受電子支付嘅,主要係紅頂小巴同小商店,例如茶餐廳、藥房、部份街市等,但我相信隨着電子支付戰爭愈來愈白熱化,就會有更多小商店支援電子付款,就好似吉野家都順應民意,𠵱家都裝返部八達通機。

好多人或者覺得香港應該好似內地手機支付咁,一機在手,到處通行之外,同時做到綫上綫下嘅服務。積臣自己都有個內地微信支付帳號,做到call車、book酒店、叫外賣等,的確係好方便,之後就感受到喺內地無手機錢包就生活唔到嗰種感覺。咁香港要跟隨嗎?香港同內地社會狀況始終唔同,香港嘅支付市場份額一早被信用卡同八達通卡搶佔晒,要整合做一個難度亦高。我唔抗拒香港做到咁樣,不過我就唔夠膽喺生活上只係依賴一部電話搞掂,因為現實上我試過太多次電話無電(係連「尿袋」都叉乾埋嗰種),到時我就唔想行路返屋企……。所以積臣就覺得,或者𠵱家情況咁,多幾個選擇都唔係一件壞事呢!?

 

【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享受人生。

撰文 : 積臣

欄名 : 積財有計

緊貼財經時事新聞分析,讚好hket Facebook 專版