【退休計劃】退休的定義是什麼?

博客 15:17 2018/10/19

分享:

其實窮生一直都唔想寫退休,因為本人的讀者群偏向後生,退休對大家黎講都頗遠,失業可能會比較近一點(笑)。但係日前被好友點醒,佢話當你要叫一個人起步去跑,你必先要俾佢知道,佢會跑去邊。我覺得呢句說話好有智慧,呢篇文就當係對佢呢句說話的一個回應,大家討論一下,呢個人生的對岸-退休。

窮忙與退休的相對關係

呢篇文到窮忙的對岸,我的確係想大家清楚了解,大家對退休既定義都唔同。呢篇文所講既,只係窮生自己所定義既退休,而主流所講既退休,對我黎講係恐怖,而且荒謬既生活黎

所謂窮忙的狀況,具體來講就係忙完一輪,都係冇乜回報。日日忙完,搵返來的只夠應付返最近的生活開支,而工作的時間本身已經佔了生活的大部分時間。白忙。

而退休?好多人定義就係唔洗做。日日享受人生,自由自在。點解要將退休定義為係窮忙的對岸?因為只要你唔係有個好DADDY,你一出來做嘢,必定由窮忙開始,有幾窮,就有幾忙,視乎你屋企環境有幾好了。好多人都話,而家努力做嘢,為的就係有一日可以「上岸」,即係唔洗做。所以大家就好似喺大海中,由窮忙跳落水一直游過對岸一樣。但有冇人清楚諗過,其實大家終點係唔係一樣呢?你又有冇游啱方向呢?

退休即係唔洗做?咪咁OUT啦!

喺香港呢個日做夜做的城市,好容易會覺得,如果有一日唔洗做就好了。其實咁諗係好易令你迷失。上一代好多人都係老老實實工作到65歲,老來仔大女大,根本冇哂包袱,退休一年已經頂唔順。我認識唔少的士司機、公司中層,其實都係已經搵到下錢,退左休一段時間頂唔順出來搵返份工的。再講,我地呢代又長命過上一代,今日老嗰班PLAN退休可以係食廿年,我地老果陣分分鐘係四十年啦!當機會冇以前咁多,而人工普遍又比上一代更唔見使,如果你仲係用緊上一代,搵夠退休呢個概念來RUN,點得呢?會唔會對自己既退休計劃作少少改變好啲?

我記得多年之前,前天文台長林超英係退休後講過:「返工係為左放假,工作就係為左退休,即係做野就係為左唔做野」。呢個就係將工作同賺錢掛勾之後得到既結果,所以佢退休之後,出席好多演講,導賞活動。搵到的錢一定冇以前咁多,但係一定比以前忙,呢個都算係退休生活,仲係好唔錯既退休生活!退休比返工更忙!只要工作係我鍾意,而身體許可,我唔介意做到90歲。

退休係一種心態

其實係窮生既眼中,退休唔係一種狀態,反而係一種心態。所謂退,即係可進,亦可退,休者,都係可休而可不休,即自己隨心。做嘢,單純出於「件事好有趣」或者係「係工作中有得著同意義」而做。當中完全冇任何生活上既考慮,都係一種退休的方式。即係話,你有權出來做幾年嘢,已經可以「退休」。

講到呢度,以上既觀念對你將來的退休計劃有重大影響,因為我地以經唔再係消極地係二、三十年用盡方法搵夠退休後要洗既錢,而係為左退休後可以更加「隨心」而鋪路。錢,當然是重要一環,因為退休後既收入多數會比你退休前低很多。所以最傳統的儲錢係要有,但係幾多錢都唔及你有多元而穩定的被動收入,例如收租收息/一啲偏向被動型既生意咁保障到你老年既平安。此外後生果陣除左望住錢向前衝之餘,都可以係工餘既時間發掘下自己既興趣,隨時會掘到商機!

在此推介一本大前研一的舊作《OFF學》,十分同意當中的精神!的確,我識得叻的人,都係做嘢叻,玩更叻!讀完呢本書之後,不妨來討論一下!

【文章來源:窮家有道;獲作者授權轉載。原題:窮忙的對岸-退休】

關於作者:

窮一生,80年代末期出生,背負著香港地所有失敗者的標籤。 單親家庭、公屋仔、母語教育、唔靚仔、冇錢、讀乞食科、從事全香港公認最乞食的行業。 22歲由3萬元的總資產,12K的月薪開始上路,26歲儲到人生第一個100萬。2年後再把這100萬翻倍! 自小明白錢很重要的窮生,並沒有為此而變成為利是圖的人。 反而憑著理財的優勢支持自己繼續當這不能搵食的工作。 天生數字狂,乜都鍾意計一餐,卻反而是個設計工作者,相信人是立體的,人生也一樣。有了理財技能使我可以「窮一生」的追逐興趣!

撰文 : 窮一生

欄名 : 窮家有道

緊貼財經時事新聞分析,讚好hket Facebook 專版