愈窮愈見鬼 點先可以脫貧

博客 11:41 2018/10/18

分享:

貧窮問題係咪真係冇得改變?貧窮原因係乜?出身貧寒就註定隔代都逃不過貧窮的命運?專欄作家窮一生用「窮蝴蝶效應」,去解釋點解會有「跨代貧窮」問題。而出身貧窮,又點樣先可以扭轉命運,停止呢個窮蝴蝶效應!

窮在起跑綫 影響競爭力

蝴蝶效應 (Butterfly effect) 好多人都聽過,係指在一個動態系統中,初始條件下微小的變化能帶動整個系統的長期的巨大的連鎖反應,是一種混沌的現象。冇錯!呢個係wiki嘅解釋。可以用黎解釋點解你咁窮,於事我為蝴蝶效應作一個伸延,叫「窮蝴蝶效應」!

「窮蝴蝶效應」所謂動態系統講嘅就係市場/社會…初始條件就係出生係中產/窮家(就先唔講富豪)。所謂混沌現象講嘅就係之後嘅際遇,聰明嘅你睇到呢度就會明白,今次窮生講嘅就係「跨代貧窮」。

好多學者會做好多數據去查證,當一個人出身係窮家,由於家人冇錢俾佢去學野,去補習班。尤其係兩文三語的水平落去令佢係公開試競爭力下降,令到窮人嘅大學入學率比其他家庭低。影響之後嘅起薪同終生嘅收入。呢d好科學而又大家都知嘅野係真嘅,係重要嘅。但唔係我想講。

點解?已經過左去,追唔返!窮生中學時代英文差,公開試失敗。入唔到自己心儀嘅科,返唔到轉頭嘅野無謂講。事到如今,窮生今次就同大家講下自己心態上可以點樣去停止呢個窮蝴蝶效應!

窮圈子的資訊不對稱

因為由窮變富係一個學習過程,同返學一樣,學習嘅過程環境同氣氛好重要。現實D講句,你圈子根本個個都係基層,佢地嘅思維都難免係窮人嘅思維。而因為冇錢嘅關係,你都比較難同中產嫁上嘅人去接觸,所以你每日接收嘅資訊都好唔全面。其實香港已經算係相對資訊對稱,窮人都唔難買到手機或者電腦,大家只要一上網就可以好易接觸到唔同階層/圈子嘅人,學習佢地嘅想法同眼光。

所謂吸收別人嘅經驗係好重要,因為有錢家庭本身大多都係生意人/專業人士,無論人際網絡同生財嘅技巧都係熟練,而佢唔會亂教人,自己嘅下一代當然會有利去學習向上流技巧,自然就俾我地呢D窮L容易接收到有用嘅資訊啦!

愈窮愈要儲起一分一毫

所謂「識睇一定睇留言」,好多時窮生分享儲錢心法嘅時間都會有唔少網友質疑成效,覺得一個月儲三幾千又要唔準食貴野,又要戒煙覺得辛苦得黎冇咩用。反而調侃窮生,話不如做多幾年人工高D先開始儲仲有效啦咁話!其實呢個係好短視同好跳躍嘅邏輯。係窮生嘅心法入面,搵得愈少錢,反而要儲得愈大比例!因為資產係要資金累積,而如果你愈早可以累積資產,係令你愈易脫貧。呢樣野可以分幾個層次去長遠影響你嘅生涯規劃。再講,儲錢嘅黃金期一定係30歲以下,因為你未有咩包袱。雖然搵得少,但係支出都少。30打後,你可能有車,有樓(冇樓仲要交租),有老婆仔女,老豆老母又可能退哂休又病咁。你好難好難再大比例咁儲到錢,咁就好影響你未來係財富增值上作出嘅決定。

財政不穩就不敢冒險

之前篇文都有提過,窮忙係因為晉升機會不理想。而要係事業上有所提升,不論創業、博升職或者跳槽,都要冒風險。好似你打拳,你出拳一定會露出破綻,但你唔出拳,一定會輸!如果你明知自己中一拳就會暈低,你仲敢唔敢出拳?

中產家庭有財力,後生仔出到黎唔洗擔心住屋問題,自己搵自己儲,當然少好多壓力。佢可以發展自己鍾意嘅野,搞小生意,甚至搞藝術!可以用幾年時間去STARTUP,只要唔做到債台高築,冇收入都唔係問題。如果你冇錢?你下個月有冇飯開都未知,你點去闖?就算係打工仔,你財政不穩,你連裸辭都唔敢,你點可能把握住一D好嘅工作機會?你只會晚晚OT,怕老細覺得你唔掂,你連工都冇埋。對工作敢怒不敢言,變相公司都冇人睇得起你,因為你根本係Loser。

當你戶口有$5000而你打緊份$15000一個月嘅工,同你戶口有$500,000而你打緊份$15000一個月嘅工,你嘅心態同你著眼嘅野係完全唔同,平衡時空就係咁樣黎!香港地愈窮愈見鬼,所以你而家窮!捱一陣,有少少錢,你心態就會唔同,眼光都會遠好多!

祝你大早日擺脫窮蝴蝶!

【文章來源:窮家有道;獲作者授權轉載。原題:點解你咁窮?——窮蝴蝶效應】

關於作者:

窮一生,80年代末期出生,背負著香港地所有失敗者的標籤。 單親家庭、公屋仔、母語教育、唔靚仔、冇錢、讀乞食科、從事全香港公認最乞食的行業。 22歲由3萬元的總資產,12K的月薪開始上路,26歲儲到人生第一個100萬。2年後再把這100萬翻倍! 自小明白錢很重要的窮生,並沒有為此而變成為利是圖的人。 反而憑著理財的優勢支持自己繼續當這不能搵食的工作。 天生數字狂,乜都鍾意計一餐,卻反而是個設計工作者,相信人是立體的,人生也一樣。有了理財技能使我可以「窮一生」的追逐興趣!

撰文 : 窮一生

欄名 : 窮家有道

緊貼財經時事新聞分析,讚好hket Facebook 專版