【#deletefb】30歲的你仲有冇繼續用FB?

18:39 2018/10/12

分享:

最近同個死黨傾計,兩個男人傾返以前讀書時嘅往事,有笑有淚,老土都要講句「那些年呀」!讀書時hi bye friend多,最多係互相add下Facebook,扮下自己好似好多朋友咁,好少喺畢業之後會繼續聯絡,就算讀書時幾咁老友,畢咗業之後總會有啲原因愈來愈疏遠,通常都係碌FB時先知佢近況。

身邊朋友紛紛都話:Facebook無嘢睇嘅,好多廣告,好悶呀。悶到點?就連FB老闆Mark Zuckerberg都發現用戶嘅使用時間不斷減少,於是就喺年頭話朋友嘅更新係會優先睇到,諗住維持返用戶對FB黏性。但之後發生劍橋分析嘅醜聞,歐美紛紛出現#deletefb熱潮。咁香港呢?老實講,積臣我就唔多覺有人真係#deletefb。點解?或者我哋仲停留係靠FB八卦到其他人近況。

80後、90後呢一代已經係FB建立咗巨大嘅依賴關係,朋友嘅近況、網絡世界發生嘅事,或社會時事資訊,都係睇FB最快知道。係現今手機年代,你唔用社交媒體就好似變咗「單機」咁 -- 自己同自己玩。你無得唔用,但你又唔會用太多時間碌FB。積臣身邊嘅朋友都係一樣情況,依家都只係間唔中先會post下嘢,平時都係快速碌下、like下post就算,share post都唔多了,FB變咗純粹睇新聞,消磨下時間,多過同朋友互動。但愈少人post野,就愈少野可以睇,真係死結。

30歲的你,陸續見到FB朋友的結婚相、BB相、家庭照等,慢慢發覺自己有初老的感覺,FB朋友已經進入人生另一階段,但自己仲係原地踏步,暗地裏作出比較,就更加想遠離FB呢個平台。

因為工作的緣故,我無剷FB,但我開始unfollow自己平時少睇嘅fans pages,閂咗經常彈出又好煩嘅推送,令自己個動態消息少咗累贅。依家我同身邊嘅朋友都轉移陣地去Instagram,用Instagram時間多過FB,一來廣告比較少(但最近好似有增加趨勢),二來比較多休閑輕鬆內容,有得笑吓囉。00後最受歡迎的snapchat我就無玩了,點解?因為積臣身邊無朋友用緊,唔想「單機」呀!

 

【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享受人生。

撰文 : 積臣

緊貼財經時事新聞分析,讚好hket Facebook 專版