【90後理財】儲錢唔係積穀防饑咁簡單

理財 17:14 2018/10/11

分享:

網上流傳一個故事,大約係講有個90後約左一間公司10點鐘去見工,點知去到HR話老細開緊會要等等,個90後等咗半個鐘終於忍唔住起身走,仲話:「公司都有expectation, 唔希望員工遲到, 我對公司都有expectation, 約左10點interview, 宜家都10點半了. 如果你地約好個客10點, 你會唔會遲到半小時? 」HR亦回敬一句:「你喜歡啦,宜家是你來求工作, 等老細是常識吧?」

網上反應好差參半,年青人大多支持90後,覺得我唔係嚟乞份工,你同樣需要我。年紀大的都有部分認為出嚟做野係咁,老細始終係老細,90後唔應該意氣用事。窮生就唔大唔細喇,我就咁睇,出嚟打工所有嘢都係講回報,我唔知嗰位90後係唔係真係意氣用事。但呢D咁「有型」的態度,事前係要做D準備,就係你有冇能力慢慢揀工嚟返。

窮生早幾年可以有幸同好多唔同的90後青年分享自己對理財的睇法,因為大部分在場學生都係返下Part Time,就算出左嚟做野嗰D都係頭1年。所以我的主題都係集中喺儲錢,我經常有句格言就係「愈低人工愈要儲得多」。我次次講親大部分90後都對呢種想法嗤之以鼻。覺得自己可能都係搵得10K左右,左扣右扣果D錢都唔會得返幾多,不如等做多幾年手頭鬆D先儲會有效好多。如果大家都係咁諗,就真係唔明白儲錢既真諦喇!

大部分後生仔喺未打算成家立室之前,接觸儲錢多數係因為有D野想買/有旅行想去。係有個目的地做一個由1個月到1年左右的儲錢計劃。但係出得嚟社會做嘢,要面對的就唔係買一樣野咁簡單,而係計劃人生。我係想講,你愈儲到錢,你就愈可以「有型」。

窮好多時係一個惡性循環,現實未必可以人人入3大神科出嚟幾萬蚊一個月。大部分人出黎都係萬零蚊。之後又OT,又多錢要用要交卡數又未找咁樣,有好多90後做幾年後可能會改口:「老細始終係老細,00/10後唔應該意氣用事!」
 
正如我之前所講,出嚟打工所有嘢都係講回報,係唔係嚟乞工作,只有你自己先知。你有錢喺身,可以慢慢揀的能力就高D,大家有冇D朋友係好難轉工,返工俾人蝦又唔敢出聲?你估佢EQ好高呀?因為佢下個月洗費都要煩惱,佢冇能力慢慢等一份可以令佢爬得更高的工作,久而久之佢既上升階梯都唔會理想,10年後佢的人工就會比其他人低,呢10年累積的損失就真係見到都喊出黎。

一個人(尤其男人)喺30歲左右開始係事業衝刺期,即係話你30歲前係鋪緊條跑道,好彩的是呢條道條冇「三跑」咁貴,資金就來自你每月可以萬幾兩萬的人工。所以窮生哲學就係,儲錢唔係老土嘢,唔係防饑咁簡單!儲錢係令你可以做起身轉身走果個90後,同個HR講我對公司都有expectation。你值得有更好的待遇,呢半個鐘係留俾D下個月唔知點算既人等,佢將會跌入唔儲錢既惡性循環。

【文章來源:窮家有道;獲作者授權轉載。原題:呢半個鐘,係留返俾冇儲錢既90後嘅!】

關於作者:

窮一生,80年代末期出生,背負著香港地所有失敗者的標籤。 單親家庭、公屋仔、母語教育、唔靚仔、冇錢、讀乞食科、從事全香港公認最乞食的行業。 22歲由3萬元的總資產,12K的月薪開始上路,26歲儲到人生第一個100萬。2年後再把這100萬翻倍! 自小明白錢很重要的窮生,並沒有為此而變成為利是圖的人。 反而憑著理財的優勢支持自己繼續當這不能搵食的工作。 天生數字狂,乜都鍾意計一餐,卻反而是個設計工作者,相信人是立體的,人生也一樣。有了理財技能使我可以「窮一生」的追逐興趣!

撰文 : 窮一生

欄名 : 窮家有道

緊貼財經時事新聞分析,讚好hket Facebook 專版