【達人理財】唔使窮遊有辦法 周奕瑋4個儲錢Tips

理財 08:00 2018/10/05

分享:

新一代日本通周奕瑋(Jarvis)憑住貼地日本遊推介上位,如100日圓100秒內任搶衫、0日圓Pizza、100日圓吞拿魚放題等等,至今仍為網民津津樂道。做當紅旅遊達人不容易,平均每個月要飛一至兩次,所以周奕瑋每年都會獎勵自己,例如去一趟「唔會好窮遊」的旅行,因他自有一套旅遊「理財」模式。

「大家覺得我好貼地,但其實我唔係好窮遊,或者一定會慳到好盡。我自己的模式係,錢唔係要使得少,而係要使得啱,個CP值要高。」

不少港人去旅行,會專揀凌晨機去晚機返,目的是想賺盡時間去更多景點,又或會花幾晚通宵上不同網站格價。「好似買藥粧咁,去10間舖頭格價,可能平50日圓或100日圓,買5件係平500日圓,但不斷格價,消耗了腳骨力、精神,以及享受旅程個心情,都係無形的,(格價)其實已花費咗你的資產。」周奕瑋認為:「旅行唔應該去到咁辛苦」。

「好多時大家以為理財精明,就係使得少,但我覺得唔係咁樣。有啲錢係應使得使,該使就要使,唔係話平咗少少錢就抵番,呢樣嘢喺旅行係好清晰體現到。」周奕瑋認為這套觀念,雖然在旅途上更突顯,但在生活中一樣應用到。

「其實在生活上、投資上和不同界別上,呢個Mindset好緊要,即係要識得將啲錢,用喺啱的地方。」

強蓄金買穩陣基金

本身愛好旅行的周奕瑋,除了去日本多次到不能勝數外,歐洲也是他喜歡的旅遊國度,所以他也會有要求,要住得舒適兼要夠「Relax」,這才是旅遊。能夠每年獎勵自己去一趟Relax的旅行,全靠周奕瑋自己成立的「強蓄金」,一個他為自己定下的儲蓄理財計劃。

本身屬處女座的他,不諱言性格比較謹慎和小心,「好怕見到自己戶口冇晒錢,銀包如冇乜錢,都覺得個人好唔踏實」。所以當每個月出糧時,他會將半份糧儲起來,存放在自己不能夠接觸的地方,而餘下的半份糧就慢慢花費。

「儲出來的一半糧,係我自己一個基金,可能係用嚟買嘢,又或是儲錢買樓,好似強積金咁,但就係我自己強迫自己儲的,我叫強蓄金,即強制儲蓄基金。呢個做法一來可以儲到啲錢,二來係習慣,如一個月有1萬元糧,只係俾自己用5,000元,可以幫自己建立一個唔好咁大使的習慣。」

現時,周奕瑋每月會盡量迫自己儲蓄5位數字。由2006年出道至今,這個「強蓄金」基金已滾存達6位數字。

他亦有用部分儲蓄作投資,由於沒有時間研究股票,因此只會買相對穩陣又有回報的基金,不會買股票。「我18歲時試過買一張六合彩,真係成條電腦飛冇一隻字中,我係冇乜呢啲投機運,所以都係踏實啲好。」八十後的周奕瑋,理財態度比較穩中求勝,除了歸究自己是處女座,其實跟周父有莫大關係。他說父親的投資策略較保守,教他投資要量力而為,不要將全部資金都押在投資上,所以他的理財法是學習父親對金錢的概念和理財心得。

樓價貴暫末諗上車

不少年輕人都有上車煩惱,但周奕瑋認為現時樓價貴,加上是單身,暫未有買樓需要,寧願先做好儲蓄,等到對的時機入考慮入市。「其實Daddy曾給意見,話不如買咗個上車盤先,等樓價再升再樓換樓,但我好怕研究點樣上車先係最明智,尤其在香港這個城市,覺得我呢個年紀的人如果俾一層樓綁住,就成世人為層樓付出好多嘢。」

周奕瑋認為,每個家庭的情況也不一樣,但自己會盡量不靠父幹上車。「因父母養大我已使咗好多錢,如去到買樓呢一Part都要佢哋粗心,自己覺得未免太過對佢哋唔住。」他說自己父親當年也是一手一腳儲錢買樓,然後再樓換樓,認為自己也應該可以如父親當年一樣,行到做到這一步。

周奕瑋不下一次說自己對理財「唔係好有心得」,但如果投資成敗取決於理財態度,從他「醒住」旅遊、對金錢的概念,到「強蓄金」的堅持,其實可在旅遊達人之上,再多封個八十後精明理財達人身分。

【原文刊載於:iMoney智富雜誌

緊貼財經時事新聞分析,讚好hket Facebook 專版