【定期存款】 淡市佛系理財 識做定存一定咁做

理財 20:28 2018/10/10

分享:

加息,對金融市場各個環節都會有影響。對一般平民百姓而言,加息最直接的影響便是存款利息有可能增加,及借貸成本有可能增加。在加息大環境下,本港多間銀行都相繼增加港元定期存款利息,普遍都有2厘息。喺而家股票市場吹淡風的環境下,做定期存款都可以話係穩定地令筆錢有息收的做法。做咁做定期存款有冇策略?「窮家有道」版主窮一生有以下睇法。

經濟會有幾差 留意通縮危機

其實一般黎講,定期真係冇咩好講,因為都係放錢係銀行,分別只係在於你會lock實左筆錢一個時間唔郁得,對投資人黎講呢個係大忌,因為我早前都講左要善用現金流,定期就係減慢現金流動嘅工具,好似就同平時我所講嘅野背道而馳。問題就係當經濟狀況變差,我地首先要分清楚,呢個「差」,到底係差住通脹定係差住通縮?前者我地係08年開始都經驗過,因為經濟差,美國政府決定打刧窮人去救企業,所以QE。錢唔值錢,出糧輸通脹,份糧一年比一年唔見駛。你明知到今日呢100蚊下年價值更低,所以我地懂得盡量加大今日嘅現金流去買入資產,過去呢十年我地見證到呢招嘅威力。

好多人可能好後生(包括窮生),出黎做野之後根本未試過通縮。我地知通脹難頂,反而唔知通縮先係地獄。呢樣野要先提,係因為多少同定期有關,因為而家各大銀行都提升定存息率,所以呢半年傳媒講多左定期嘅資料,點解定存息率會升?因為大家都搶存款,點解搶存款?因為流通嘅錢少左。流通嘅錢少左,現金嘅價值自然提升,而流通嘅錢少左就係通縮。同通脹相反,通縮就係你份糧一年比一年好駛(如果到時仲有糧出),而你會發現今日呢100蚊下年價值更高,資產嘅吸引程度減少,大家明知係咁會點?冇錯!就係大家都會減少駛錢,包括投資。如此一來現金流就會停止,你同我現金流停止,最多係冇左被動收入。但如果係公司現金流停止,就係執笠,咁你同我份工都凍過水,但當面對通縮,呢樣野似乎無法避免。

寧做定期 謀定而後動

我唔係話呢個情況下年一定會到來,但係我會做定準備。所以現在我手頭上有筆現金,而正如某投資達人都話,唔投資都係冒緊風險!冇錯的,你係冒緊冇回報嘅風險,而且你就咁放係銀行就一定冇回報。所以我會暫時做定期,謀定而後動。另外,關於唔同銀行做緊幾多厘,大家可以係我Facebook再update,因為呢啲野隨時變,而且隨時google到,我就唔係度討論了!

定期最好分段做 唔使綁死筆錢

正如我頭先講,定期最唔好就係lock實左筆錢,令你有機會把握唔到機會,唔夠靈活。所以我自己會好似月供股票一樣,可以2-3個月投入一定數額的新資金去做定期。如果一來你每隔一段時間都會有筆錢可以鬆綁,再決定筆錢嘅去向,成件事就靈活好多了!

不過有2點要留意,就係各大銀行最低入場費都唔同,有部份銀行甚至可能要100萬先做得到,咁大家就要睇返自己現金有幾多,揀返自己用到嘅銀行定期服務。其次,好似以前咁,好多銀行如果要親身去分行先做到定期,咁用我呢個方法真係死得,你咪2-3個月係咁落分行?真係唔駛開工咩!所以如果你係打算分段做定期,最好就用返可以網上申請嘅銀行去做,咁返工係Office都可以操作得到,就唔洗行黎行去。

美元定期的兩大用途

其實定期都可以做好多唔同地方貨幣,今次我講美元,係因為我自己會做。有網友早前問我對港元同人民幣定期嘅睇法,呢個大家有少少誤區,你問呢個問題,其實唔係問緊有關定期嘅問題,而係外匯投資問題,你單純係問嘅係我對個別貨幣走勢嘅睇法。我今次會做美國定期係有2大原因,第一係定期,收息避險,咁點解唔做最直接嘅港元定期?一來美元定期息口高少少,但問題係銀行有買出賣出價,如果你下下做完又轉返港紙,其實你只係幫銀行搵緊錢。

所以我第二個原因就係,儲美金。我對美元有需求,例如而家港滙急升,我可以趁而家做美元定期,到我筆錢鬆綁,我就有一筆美元資金可用,到時我可以直接射過美股投資戶口,唔需要到我要美元果陣先電匯,到時個rate未必靚。另外呢個都係受我自己對貿易戰分析嘅影響,暫時傾向將自己部份資金轉成美元,方便日後部署。至於港人至愛之一嘅澳元則可能只有短線的反彈,相信隨住美元同澳元的息差收窄,加上澳洲對中國嘅依賴,資金會更懂得選邊站的。

【文章來源:窮家有道;獲作者授權轉載。原題:淡市佛系理財 – 定期存款有得諗】

關於作者:

窮一生,80年代末期出生,背負著香港地所有失敗者的標籤。 單親家庭、公屋仔、母語教育、唔靚仔、冇錢、讀乞食科、從事全香港公認最乞食的行業。 22歲由3萬元的總資產,12K的月薪開始上路,26歲儲到人生第一個100萬。2年後再把這100萬翻倍! 自小明白錢很重要的窮生,並沒有為此而變成為利是圖的人。 反而憑著理財的優勢支持自己繼續當這不能搵食的工作。 天生數字狂,乜都鍾意計一餐,卻反而是個設計工作者,相信人是立體的,人生也一樣。有了理財技能使我可以「窮一生」的追逐興趣!

撰文 : 窮一生

欄名 : 窮家有道

緊貼財經時事新聞分析,讚好hket Facebook 專版